2026年係大阪府大東市嘅市制施行70週年。呢個小城市有一項珍貴嘅歷史文化資產——「地車（だんじり）」，即係傳統祭典中由多人合力拖行嘅大型彩繪車。
大東市將喺 2026年11月8日（星期日） 喺 大東中央公園（大阪府大東市深野一丁目一帶）舉辦「大東だんじり大集結2026」。呢次大集結係 10年來首次 將市內各地區嘅地車同神輿集中喺市中心同一地點展示，一共有 27台地車、2台神輿，合共29台 參與。
當日流程（時間均為日本標準時間）
- 上午9時：開場
- 上午10時：入場遊行——29台地車／神輿經入場門口進入，行經觀覽席同花道中間
- 上午11時30分：儀式
- 中午12時起：29台分5組輪替表演
- 下午1時起：退場遊行——各地區嘅地車／神輿返航，觀眾可近距離欣賞精緻雕刻同裝飾
- 下午2時左右：開放一般來訪者參與「拖行體驗」（曳行体験），無論大細何人都可以拉繩試一試
除此之外仲有兒童遊園會、約15台餐車、賣參與地車神輿相冊日曆、大東市PR booth（專設地車介紹同限定謎語遊戲）、地車雕刻實演區等。入場 免費。
點樣去
主辦方建議步行、騎車或搭免費穿梭巴士。
圖片：KishujiRapid／CC BY-SA 4.0／Wikimedia Commons
- JR野崎站：步行約15分鐘
- JR住道站：步行約20分鐘
- 免費穿梭巴士：喺住道站南側及野崎站西側的士站開出，首班8:30，尾班16:30（自大東中央公園返回），大概15至30分鐘一班，視乎即時路況。
活動當日國道170號（大阪外環狀線）及會場周圍道路會有交通規限。小雨照常，惡劣天氣取消。
順帶一提
大東市一帶嘅地車特色係以大型嘅「北河內型」為主，亦有同大阪市、岸和田市相似、以精緻雕刻見長嘅款式。大東市嘅地車歷史可追溯至文政年間（1818–1830），由當地農村發展同祭祀習俗而來，係各村落世代相傳嘅文化遺產。
放假君批假
呢種「10年先有一次」嘅地方祭典，好適合安排喺11月頭去大阪玩嘅時候一腳帶過。大東市距離大阪市中心唔遠，搭JR就可以到，一日來回足矣。重點係 免費入場、11月8日一日限定，想睇呢陣地車神輿同場出現，呢個日期就係唯一選擇。
放假君｜日本正經
