小田急相模大野站北口行入去，沿天橋直入 bono 相模大野購物中心，4 樓由今日起多咗間 GiGO（GiGOボーノ相模大野ショッピングセンター），10 時開門。呢層今次全面改成親子主題，GiGO 就開喺免費兒童空間「bono Kids PARK」對面，買嘢同玩嘢喺同一層搞掂。
GiGO 總面積 163 坪，設 123 部機台，其中夾機機 95 部、體感遊戲 4 部、兒童遊戲 24 部。最特別係神奈川首間「Kids Market」：小朋友喺指定機台玩完攞到 ticket，集齊點數就可以換糖果同玩具，官方話呢種「購物體驗」對小朋友亦算係一種學習。
旁邊嘅「bono Kids PARK」免費入場，設 0–6 歲室內遊具、AR 體驗同繪本角，整層仲有家庭餐廳、兒童服裝、100 円店同雜貨店，開 10:00–21:00。
地址：神奈川縣相模原市南區相模大野 3 丁目 2 番，bono 相模大野 SC 4 樓。火車：小田急線相模大野站北口步行 3 分鐘；私車：東名高速橫浜町田 IC 約 5km，商場泊位 688 個。唔支援電子支付（電子マネー），備硬妹啦。
開業期內，用 GiGO App 喺店內 Check-in 可以攞 Kids Market 免費點數卡兑換券，數量有限，用完即止，詳情留意店舖官方 X。
