10月30日晚間，一列由旭川發車開往稚內的JR宗谷線「佐呂別（サロベツ）」3號特急，駛至天鹽中川站同問寒別站之間時撞上一隻熊，車頭車輪出軌。事件發生約喺晚上10時許。
JR北海道表示，熊隻懷疑卡在車底，加上現場已天黑，無法即時檢查；車上32名乘客同2名車組人員，合共34人，被迫留喺車廂內過夜。列車保持通電，暖氣同洗手間照常運作，最終無人受傷。
31日早上約6時30分，獵人同JR職員到場檢查，確認熊隻喺車底、車頭車輪出軌。受困嘅乘客及職員其後獲安排乘計程車離開。
圖片：t-konno／CC BY-SA 3.0／Wikimedia Commons
受事故影響，宗谷線31日多班列車停駛或取消：來往音威子府至稚內嘅班次全日停駛，音威子府至名寄嘅部分班次取消，當日合共5班取消；11月1日嘅行車情況待確認後公佈。
阿經提醒：呢幾日北海道列車撞熊事件唔止一宗。同屬宗谷線，26日曾有一列由名寄開往音威子府嘅列車喺日進至智惠文之間撞熊，兩班車停駛；29日下午，石勝線占冠至新夕張站之間亦有同類意外。計劃行北日本線（旭川、名寄、稚內一帶）嘅讀者，出發前務必查清楚最新運行資訊，留意JR北海道官方公佈；行車時間長、沿途路過郊野路段嘅班次，要預留充足時間，跟住車務人員指示。
阿經｜日本正經
_-_panoramio.jpg){kind=link}