星のや軽井沢（Hoshinoya Karuizawa）今年冬天有份「開運住宿」俾你一次過搞定。

「軽井沢 開運滯在」於2026年12月1日至2027年2月20日期間首推，主打喺最靜嘅冬日森林入面修身養性，加上參拜有約2000年歷史嘅「熊野皇大神社」（Kumano Sumitomi Shrine），同埋食一餐「開運」朝食。

參拜千年神木，開運

呢間神社據傳由日本武尊創建，約2000年歷史，並列全國僅4間嘅「特別神社」。比較特別嘅係，神社中央正正係長野縣同群馬縣嘅縣界，長野側為「熊野皇大神社」、群馬側為「熊野神社」。當地人話跨縣界參拜係「突破運氣嘅境目」，可提升勝負運。境內有一棵樹齡逾1000年嘅神木。

「開運滯在」內容包括喺神社進行特別祈禱，並獲贈「星のや軽井沢」同神社聯名嘅原創御守。注意初穂料（6,000日圓起）未包喺體驗費入面，需喺神社現場另納。

棚田開運朝食、水引手帳

同套體驗仲有：

  • 棚田嘅開運早餐：喺望得出棚田嘅暖桌席食，主菜係香煎鯉魚，另有九款含「ん」（運）字嘅小食拼盤
  • 冬季村落巡禮：喺園區內冬日森林散步，聽導遊講運氣樹木
  • 星野温泉トンボの湯：露天温泉同60分鐘精油治療
  • 水引手帳製作：學信州傳統工藝「水引」做專屬手帳
  • 大筆書法：用大字寫下新一年嘅決意

實用資料

  • 期間：2026年12月1日–2027年2月20日（有除外日）
  • 體驗費：56,000日圓（税、服務費已包，房費另計）
  • 包含：冬季村落巡禮、Spa體驗、山間懷石1次、開運早餐1次、水引手帳、大筆書、神社祈禱及原創御守
  • 名額：每日1組（最多2人）
  • 預訂：2026年9月1日起，需喺官網提前10日預訂，只限本酒店住客
  • 住店：星のや軽井沢，77間客房，1房1晚170,000日圓起（税、服務費已包，食費另計）；JR軽井沢站乘車約15分鐘
  • 因天氣關係，部分項目時間及內容或有調整

放假君批假

「開運」呢個詞，信不信都有得，但喺輕井澤嘅冬日森林行嚇、泡嚇湯、寫嚇字，荷包之外嘅情緒確係有得開。「開運」係咪真係有運，行完你就知。

放假君｜日本正經