東京練馬區江古田開業咗近一百年嘅銭湯「淺間湯」（1927年，昭和2年），要喺2026年12月上旬完成大翻新後重新開放。

呢間由三代家族營運嘅老舖，因為老東主年事已高、設備老化，原本已經考慮過收檔。最後透過東京都「公眾浴場承継マッチング事業」，由喺江古田長大嘅宮井康太郎代表嘅「合同會社OFURO WORKS」接棒，先暫停營業、再重新開張。東京嘅公眾浴場十年之間由2015年末嘅628間減少到2025年末嘅417間，減咗約34%，呢個承継安排就係為咗幫住保住呢啲慢慢消失嘅街角。

翻新改咩、留咩

呢次大裝修涵蓋外観、大堂（ロビー）、更衣室（脱衣所）同桑拿（サウナ）。桑拿會裝上 Metos 電加熱爐，支持自己加蒸汽（セルフロウリュ）；大堂同更衣室會用返有木質感嘅設計。

但並非全部拆埋重嚟——老式浴室、以「家族愛」為主題嘅花磚畫（タイル絵）、同埋喺店門口迎客咗幾十年嘅信樂焼狸貓，都會原封不動保留埋，做新「淺間湯」嘅記憶。

新嘅臉、新嘅朋友

喺江古田嘅「日本大學藝術學部」設計系學生會為翻新後嘅「淺間湯」設計新 logo 同原創角色，角色就係以店門口嗰隻狸貓為原型。

此外，「淺間湯」會喺2026年11月1日起喺 CAMPFIRE 發起群眾募資，補充翻新費用。支援者可取回原創T恤同毛巾。

放假君｜日本正經