中畑町係兵庫縣西脇市北部一個人口約300人嘅小聚落，入面嘅小學已決定關閉。株式會社まんてん嘅代表喺祖父50年前創辦、停用咗30年嘅牧場遺址，花咗9個月將一條約6公里嘅荒廢山徑改造做體驗路線，喺9月試運行後，於2026年10月5日正式開幕。
越野：可以刮嘅租車
體驗核心係租Jimny行約6公里嘅山徑。まんてん公司公告話，樹枝擦傷、草擦傷、泥污同輕微飛石唔收額外費用，即「傷つけていいレンタカー」（可以刮嘅租車）。大dent、破損或事故損毀要客户自行承擔，可加購自願車輛補償CDW，每日5,500日圓，官方網站有公開車輛修理費用參考表。
解謎：山冇訊號，App仍然得
行車途中配合公司自研App，以附近西光寺山嘅「金雞」傳説為背景做互動解謎，App有謎語提示、導航同SOS功能。山內冇手機訊號，專用手機喺離網狀態仍可向總部求助，但唔可以上網查野。完成解謎後，嗰日嘅路線會成為一張「寶藏地圖」保存。
遊玩同須知
路線附近有山澗，夏季可玩水，天涼後可當野餐地點；水量激增或天氣不佳時可能暫停開放，玩水前要先確認安全並帶齊裝備。體驗期間車內車外持續錄影，完成後會收到「尖叫精選影片」。適合夫婦、朋友或家庭一齊玩。
位置：兵庫縣西脇市中畑町
正經一句：山冇訊號，行去邊記得同屋企人講清楚；想撳「傷」，記得加CDW。
放假君｜日本正經
