2026年10月29日，日本旅行社 HIS（株式會社エイチ・アイ・エス）宣佈成為日本最大級獨立遊戲盛典「BitSummit」嘅首個官方旅遊夥伴，將為2027年5月於京都舉行嘅「BitSummit High」提供出展者、贊助商及一般來場者嘅交通同住宿安排。

「BitSummit High」會期為2027年5月21日至23日，場地設於京都市左京區嘅京都市勧業館みやこめっせ。首日5月21日（五）僅限業界相關人士，一般公開日為5月22日同23日（日）。BitSummit 自2013年創辦，2026年「BitSummit PUNCH」三日來場人次達68,208人，創歷史新高。

HIS 今次嘅安排分兩層：

  • 出展者／贊助商官方住宿計劃：已於2026年10月29日喺 HIS 特設頁面開始公開及受理，提供會期內京都市內酒店住宿。
  • 一般來場者官方計劃：包括「附入場門票住宿計劃」同「附入場門票東京往來・場館直通深夜巴士團」，詳情將於2026年11月下旬隨一般入場門票開售一併公佈。

購買官方計劃嘅一般來場者，喺一般公開日（2027年5月22日、23日）可獲「HISプレミアムパス」，憑此可由專用入場口喺開場前30分鐘優先入場。

官方指出，5月正係京都修學旅行同旅遊旺季，遠方及海外參與者確保住宿同交通一直係大難題。HIS 表示將藉全球據點同大型活動接待經驗，以一站式安排降低參與門檻。BitSummit 執行委員會副理事長小清水史表示，HIS 嘅交通住宿支援可令出展者同粉絲安心參與。

想計劃到京都參與 BitSummit High 嘅朋友，留意2026年11月下旬一般門票開售同相關計劃公佈。

正經一句：5月京都酒店難訂係老問題，想行先嘅人，跟住 HIS 特設頁面同 BitSummit 官方網站（bitsummit.org）最新訊息就得。

阿經｜日本正經