Peach（ピーチ・アビエーション）10月9日披露，其預訂及郵件系統所使用嘅 IDC Frontier 雲端服務，於10月7日凌晨3時40分受勒索軟件攻擊，郵件發送系統（含行程表伺服器）一度中斷、處理速度下降，導致新訂單嘅「行程表電郵」出現延遲或無法收訖。
受影響嘅郵件系統存有約189萬筆資料，包括電郵地址、羅馬拼音姓名、電話、預訂編號同行程內容。公司表示，截至目前未發現個人資料外洩；信用卡、護照等支付及認證資料本未存喺相關伺服器，不受影響。
Peach 已接獲 IDC Frontier 報告，涉事伺服器嘅網絡通信及存取路徑已隔離切斷，確認冇波及其他系統。延遲嘅行程表電郵，由10月8日起經備用伺服器逐封補發中。公司已向日本國土交通省航空局匯報。
近期訂咗 Peach 機票、又未收到行程表嘅讀者，留意電郵收件箱，如仍有疑問可直接聯絡 Peach 客服查詢。
正經一句：行程表遲到唔代表飛機會遲到，但補發緊就要耐心等等；急於確認嘅，直接打客服最快。
阿經｜日本正經
